Ministri për Evropën dhe Punët e Jashtme, Ferit Hoxha, u takua sot me Izet Mexhitin, kryetar i Lëvizjes Demokratike dhe kryetar i komunës së Çairit.

Gjatë një konference për mediet, Hoxha e cilësoi bisedën si të hapur dhe miqësore, duke nënvizuar se u diskutuan çështje që lidhen me të drejtat dhe rolin e shqiptarëve në “arkitekturën shtetërore” të Maqedonisë së Veriut.

Sipas tij, një ndër prioritetet mbetet forcimi i marrëdhënieve mes Shqipërisë dhe Maqedonisë së Veriut, ku ura më e qëndrueshme lidhëse është vetë popullsia shqiptare që jeton në këtë shtet.

“Nuk ka axhendë për t’u takuar me bashkatdhetarët tanë, nuk ka radhë për t’u takuar me politikanët dhe të zgjedhurit. Kjo derë është e hapur për gjithkënd që ka dëshirë që të ndajmë mendime që të bisedojmë. Kemi patur një bisedë të hapur dhe miqësore. Kemi biseduar për shumë gjëra që lidhen me situatën e popullsisë shtetformuese shqiptare në Maqedoninë e Veriut, për gjithçka që ka rëndësi për të drejtat për rolin e shqiptarëve në arkitekturën e shtetit të Maqedonisë së Veriut”, u shpreh Hoxha.

“Kemi folur për nevojën për të forcuar marrëdhënien mes dy vendeve dhe natyrisht ura më e mirë, më e fortë më e qëndrueshme është popullsia shqiptare në Maqedoninë e Veriut. Shqipëria e do Maqedoninë e Veriut të zhvilluar, të avancuar e do të angazhuar në rrugën evropiane”, tha ai.

Marrë nga ATSH