Muzeu Etnografik ka hapur dyert për qytetarët e Durrësit dhe vizitorët e shumtë, duke u kthyer në një pikë të rëndësishme referimi për kulturën dhe historinë e qytetit.

Kryetarja e bashkisë së Durrësit, Emiriana Sako, theksoi se kjo ndërtesë karakteristike e shekullit XIX, e njohur si shtëpia e aktorit të madh Aleksandër Moisiu, është restauruar plotësisht falë programit EU4Culture, të financuar nga Bashkimi Evropian dhe të zbatuar nga UNOPS, në bashkëpunim me Ministrinë e Kulturës.

“Në këtë muze tashmë janë ekspozuar 125 vepra të artistëve italianë, në nder të piktorit të shquar Ibrahim Kodra. Kjo e bën hapësirën muzeale jo vetëm një vend që ruan traditën, por edhe një urë lidhëse me artin ndërkombëtar,” u shpreh Sako.

Ajo nënvizoi se muzeu përfshin gjithashtu pavionin e dedikuar Aleksandër Moisiut, si dhe pavione të tjera që pasqyrojnë artin, traditën dhe identitetin lokal.

“Në këtë hapësirë ndërthuren në mënyrë harmonike historia, kultura, arti dhe trashëgimia, duke krijuar një përvojë frymëzuese për çdo vizitor,” shtoi Sako.

Sipas Sakos, hapja e Muzeut Etnografik është një tjetër hap i rëndësishëm në promovimin e trashëgimisë kulturore të Durrësit dhe në zhvillimin e turizmit kulturor në qytet.

Burimi ATSH