Ministri i Drejtësisë, Toni Gogu deklaroi sot se Shërbimi Përmbarimor Shtetëror mund të arrijë zgjidhje konkrete, të drejta dhe të zbatueshme për qytetarët.

Në një postim në rrjetet sociale, ministri Gogu përcolli rastin e një qytetari në Korçë, i cili pas shumë vitesh përpjekjeje mori zgjidhje për zbatimin e një vendimi gjyqësor për kthim shume, edhe kur debitori ndodhej në vështirësi financiare.

Gogu tha se “përmes ndjekjes së procedurave ligjore dhe rolit ndërmjetësues të Shërbimit Përmbarimor Shtetëror, mund të arrihen zgjidhje konkrete, të drejta dhe të zbatueshme. Zbatimi i vendimeve gjyqësore është një hallkë thelbësore e shtetit të së drejtës”, tha Gogu.

Sipas Gogut, çështja ishte trajtuar edhe nga zyra të tjera përmbarimore, por pa zgjidhje. Pas regjistrimit në Zyrën Përmbarimore Korçë u kryen verifikimet dhe u ndoqën procedurat ligjore. Përmbaruesi ligjor arriti të ndërmjetësojë mes palëve duke mundësuar marrëveshje dhe shlyerje me këste për detyrimet.

Ndërsa, qytetari nga Korça shprehet se ka pasur një problem që i është zvarritur për disa vite.

“Por, kur këto dokumente kaluan në zyrën e Korçës ato m’u zgjidhën brenda 2-3 muajve. Ramë dakord me debitorin dhe çështja u zgjidh”, tha ai.

Ky rast thekson rolin e rëndësishëm të Përmbarimit Shtetëror në zbatimin efektiv të vendimeve gjyqësore.

Burimi ATSH