Kryeministri Edi Rama ndau sot të dhënat e raportit të Bankës Europiane për Rindërtim dhe Zhvillim (BERZH), i cili konfirmon se ekonomia shqiptare po rritet me qëndrueshmëri.

Gjatë podkastit “Flasim”, kryeministri theksoi se sipas BERZH, në vitin 2025 rritja reale e Prodhimit të Brendshëm Bruto ishte afro 4%, ndërsa për periudhën 2026-2027 parashikohet një ritëm i ngjashëm.

“Ky është një konfirmim tjetër e faktit që qeveria e përsërit prej kohësh, po çuditërisht, kur këto i thonë të huajt, kur i thonë organizmat me reputacion ndërkombëtar, ngjisin më shumë, ekonomia shqiptare po rritet me qëndrueshmëri”, tha Rama.

Kryeministri theksoi se këto nuk janë thjeshtë shifra statistikore, por janë indikatorë të një stabiliteti makro-ekonomik dhe të një besimi të ri të Shqipërisë tek vetja dhe të investitorëve tek Shqipëria.

“Rritja mbështetet kryesisht në sektorë, jo vetëm tradicional, pra në sektorin e pasurive të paluajtshme që mund ta quajmë tradicional, por edhe në shërbime të teknologjisë së informacionit dhe komunikimit, gjë që është një prurje e re në portofolin e ekonomisë tonë dhe që lidhet edhe me atë që thashë në pikën e mëparshme të këtyre shënimeve”, shtoi ai.

Një tjetër element domethënës, sipas Kryeministrit, është niveli rekord i investimeve të huaja direkte në vitin 2025.

“Investimet e huaja direkte janë të përqendruara në pasuri të paluajtshme dhe shërbime financiare. Një pikë që i përgjigjet asaj pyetjes së famshme dhe famëkeqe – ‘Kush i blen këto apartamente’, ‘kush i blen këto ndërtime’. Ndërkohë që blerësit me nënshtetësi të huaj, jo vetëm shqiptarë, që kanë marrë një nënshtetësi të huaj, por flasim këtu për të huaj që kanë nënshtetësi të huaj dhe kombësi të huaj, vetëm rriten”, tha Rama.

Ndërkohë lidhur me Ballkanin Perëndimor, Kryeministri nënvizoi se BERZH parashikon një përshpejtim të rritjes ekonomike, edhe në vitin 2026, edhe në vitin 2027, gjë që përbën patjetër një lajm shumë të mirë edhe për Shqipërinë, që pozicionohet me një ritëm konkurrues në këtë rajon.

/Marrë nga ATSH