Kryeministri Edi Rama reagoi sot për rastin e ish-presidentit të Kosovës, Hashim Thaçi, ish-kryeparlamentarëve Kadri Veseli dhe Jakup Krasniqi, dhe ish-deputetit Rexhep Selimi, pas deklaratave përmbyllëse në Gjykatën Speciale në Hagë, ku prokuroria kërkoi 45 vjet burgim për secilin prej të katërve, për krime lufte dhe krime kundër njerëzimit.

Në një reagim në rrjetet sociale, kryeministri Rama e cilësoi kërkesën e Prokurorisë “varrosje për së gjalli” të ish-udhëheqësve të UÇK.

“Më pyesin miq nga Prishtina pse nuk po shprehesh për mikun tënd që sot u ngarkua me 45 vjet burg në pretencën e prokurorisë së Hagës?! Nuk po shprehem dot, pasi ende po mundohem ta gjej ku buron filli logjik që ka ndjekur prokuroria për të dalë me kërkesën për varrosje për së gjalli të katër burrave dhe si kurrë ndonjëherë, fjalët nuk më vijnë në ndihmë për t’u shprehur… Ndjesë, më duhet kohë ta gëlltis gjithë atë mal me m*t që nxorri sot ajo prokurori në zemër të Europës demokratike!”, u shpreh Rama.

Rasti gjyqësor përfshin akuzat për krime lufte dhe krime kundër njerëzimit, të pretenduara të kryera midis marsit 1998 dhe shtatorit të vitit pasues në disa lokacione në Kosovë dhe në veri të Shqipërisë. Të katër të akuzuarit janë deklaruar të pafajshëm.

Prokurorja e Speciales, Kimberly West kërkoi që vendimi i dënimit prej 45 vjetësh të merret për secilin prej të akuzuarve, duke theksuar se këto akuza janë të rënda dhe nuk kanë humbur vlerën e tyre me kalimin e kohës.

Marrë nga ATSH