Kryeministri Edi Rama u shpreh sot se pavarësisht progresit të përvitshëm që është bërë në lidhje me sezonin turistik në vend, çdo bashki duhet të ketë planin e vet të sezonit.

Deklarata e Kryeministrit erdhi gjatë takimit me kryebashkiakët e vendit, ku Rama tha se sezoni turistik pavarësisht se intensitetin më të madh e ka në plazhe, ka disa të reja që publiku duhet t’i dijë.

Rama pohoi se këto të reja lidhen me progresin e përvitshëm që është bërë për të krijuar kushte sa më të denja në plazhe, por edhe për të krijuar kushte të atilla që t’i japet mundësi çdokujt që të ketë plazhin publik.

“Kjo është një e mirë tjetër e madhe që na vjen nga asetet që ka ky vend. Dhe për këtë arsye çdo bashki që nga Tropoja deri në Konispol, që nga Shijaku deri në Voskopojë duhet të ketë planin e vet të sezonit”, tha Rama.

Rama u ndal edhe në një tjetër aspekt, që është ai i legalizimeve për të kuptuar se si ka ecur formula e re e përfshirjes së Pushtetit Vendor dhe cilat janë objektivat e vitit për t’i dhënë fund këtij procesi.

Burimi ATSH