Banka e Shqipërisë bën të ditur se, norma mesatare e interesit të Bonove të Thesarit me maturim 12-mujor ka regjistruar nivele të ulëta.

Në ankandin e fundit të vitit 2025 janë shitur bono thesari në vlerën 6,15 miliardë lekë, kundrejt shumës së ofruar prej 6,65 miliardë lekë, sipas të dhënave nga Banka e Shqipërisë.

Yield-i mesatar i ponderuar rezultoi 2,44%, i pandryshuar krahasuar me ankandin e mëparshëm, duke reflektuar kushte të favorshme likuiditeti në sistemin bankar, kërkesa më të ulëta të qeverisë për financim në tregun e brendshëm dhe prime të reduktuara rreziku, të lidhura me uljen e borxhit publik dhe përmirësimin e vlerësimit të kreditit të qeverisë.

Ndërsa yield-et e bonove 12-mujore në fund të vitit 2024 shënuan nivelin 2,76%.

Niveli i ulët i yeldit të bonove nënkupton edhe kosto më të lira për kredinë në lekë, e cila ndikon në zgjerimin e huadhënies bankare. Nga ana tjetër, qeveria mund të financojë borxhin e brendshëm me kosto më të lirë.

Burimi ATSH