Kryeministri Edi Rama ka shprehur sot mbështetjen e tij për përfaqësuesen e Shqipërisë në Junior Eurovision Song Contest 2025, Kroni Pula, përmes një postimi në rrjetet sociale.

Rama e cilësoi këngën e saj si një “super krijim edukativ”, duke theksuar mesazhin e fortë për dashurinë ndaj tokës dhe shëndetit.

Ai u bëri thirrje qytetarëve që të mbështesin dhe të votojnë talentin dhe energjinë e nxënëses së shkollës “Dëshmorët e Lirisë”, e cila përfaqëson Shqipërinë në këtë konkurrim ndërkombëtar të muzikës për fëmijë.

“Le të mbështesim dhe votojmë energjinë, talentin dhe mesazhin e bukur të këngës nga Kroni Pula, që përfaqëson Shqipërinë tonë në Junior Eurovision Song 2025”, shkruan Rama, duke ndarë edhe linkun zyrtar të votimit.

Në fund të mesazhit të tij, Kryeministri i uroi suksese të voglës Kroni, duke theksuar mbështetjen e plotë të publikut shqiptar: “Forca Kron, jemi me ty”, si dhe ndau linkun ku mund të votohet https://vote.junioreurovision.tv/.

Burimi ATSH