Interesi i të rinjve për t’u punësuar në bankën e parë digjitale të hapur në Shqipëri ka qenë shumë i madh që në ditët e para të licencimit të saj.

JET Bank, institucioni financiar që synon të bëhet banka e parë plotësisht digjitale në vend, u licencua pak ditë më parë (3 dhjetor) nga Këshilli Mbikëqyrës i Bankës së Shqipërisë.

Në një takim me të rinjtë, Kryeministri Edi Rama iu referua sot këtij zhvillimi, ndërsa u ndal te interesi i treguar nga të rinjtë për t’u punësuar pranë këtij institucioni financiar.

“Kemi Bankën e re digjitale, të sapomiratuar në Shqipëri nga Banka e Shqipërisë. Aty zyrat në shumë pak ditë janë mbushur me të rinj. Numri i aplikimeve ishte mbresëlënës. Aktualisht banka kishte të intervistuar dhe në planin imediat të punësimit 100 të rinj”, tha Rama.

Sipas tij, bëhet fjalë për një bankë të gjeneratës së re, inovative dhe patjetër që është një vend pune që paguhesh mirë.

Megjithatë Kryeministri theksoi se qeveria ka bërë shumë në aspektin e rritjes së pagave.

“Duke filluar nga janari do ta çojmë pagën minimale 500 euro dhe brenda mandatit shkon 750 euro. Jemi të vetëdijshëm se ajo që na duhet është një ofertë bindëse, është oferta e vendeve të punës së paguara shumë mirë, punësim shumë më cilësor”, shtoi Rama.

Burimi ATSH