Sot është Dita Botërore e Tokës.

Mbijetesa e planetit tonë varet nga lidhja e çmuar me tokën. Mbi 95% e ushqimit tonë vjen nga toka. Për më tepër, toka është furnizuesi i 15-të nga 18 elementët kimikë të natyrshëm thelbësorë për bimët.

Sipas të dhënave të OKB-së, mund të duhen deri në 1000 vjet për të prodhuar vetëm 2-3 cm tokë. Deri në 58% më shumë ushqim mund të prodhohet përmes menaxhimit të qëndrueshëm të tokës dhe llogaritet se, prodhimi bujqësor do të duhet të rritet me 60% për të përmbushur kërkesën globale për ushqim në vitin 2050.

Por përballë ndryshimeve klimatike dhe aktivitetit njerëzor, tokat po degradohen. Erozioni prish ekuilibrin natyror, duke reduktuar infiltrimin e ujit dhe disponueshmërinë për të gjitha format e jetës, dhe duke ulur nivelin e vitaminave dhe lëndëve ushqyese në ushqim.

Kur mendojmë për tokën, pothuajse gjithmonë e lidhim atë me fshatin dhe natyrën, por OKB kujton se, toka urbane është gjithashtu thelbësore.

Kjo Ditë Botërore e Tokës 2025 fokusohet në peizazhet urbane me temën: “Toka të shëndetshme për qytete të shëndetshme”. Nën asfaltin, ndërtesat dhe rrugët shtrihet dheu që, nëse është i depërtueshëm dhe me bimësi, ndihmon në thithjen e ujit të shiut, rregullimin e temperaturës, ruajtjen e karbonit dhe përmirësimin e cilësisë së ajrit. Por kur vuloset me çimento, i humbet këto funksione, duke i bërë qytetet më të prekshme ndaj përmbytjeve, mbinxehjes dhe ndotjes.

Prandaj, kjo ditë fton të gjithë, nga politikëbërësit te qytetarët, të rimendojnë hapësirat urbane nga themeli, për të ndërtuar qytete më të gjelbra, më elastike dhe më të shëndetshme.

Burimi ATSH