Në qytetin e Korçës u festua sot 113-vjetori i shpalljes së Pavarësisë.

Në ceremoninë e organizuar me këtë rast, kryetari i bashkisë së Korçës, Sotiraq Filo, prefekti i qarkut, Nertil Jole dhe drejtues të tjerë të pushtetit vendor vendosën kurora me lule tek monumenti “Ushtari i Panjohur”, në nderim të kësaj dite të shënuar për kombin shqiptar.

Në një postim në rrjetet sociale kryebashkiaku Filo tha se “Korça është një vatër e rëndësishme e patriotizmit dhe kulturës, që i ka dhënë shumë Shqipërisë dhe që me krenari ruan kujtimin e atyre që dhanë jetën dhe mundin për ndërtimin e një shteti të lirë e të pavarur”.

Shqipëria feston sot 28 Nëntorin, 113- vjetorin e shpalljes së Pavarësisë. 28 Nëntori njihet ndryshe edhe si Dita e Flamurit, një ditë e rëndësishme për shqiptarët në trevat shqiptare dhe anembanë botës.

Burimi ATSH