Në Lushnjë u përkujtua sot 113-vjetori i ngritjes së flamurit nga nga patriotët lushnjarë.

Në ceremoninë e organizuar me këtë rast ishin të pranishëm deputeti i PS-së Elton Korreshi, prefekti i qarkut Avdi Snalla, si edhe kryetarja e bashkisë së Lushnjës, Eriselda Sefa, e cila ngriti simbolikisht flamurin.

Më pas të pranishmit vendosën buqeta me lule pranë përmendores, ku janë skalitur emrat e patriotëve lushnjarë, që kontribuuan në shpalljen e pavarësisë.

Në një prononcim për mediet, Sefa tha se “më 27 nëntor 1912 qytetarët dhe patriotët lushnjarë ngritën flamurin dhe shpallën pavarësinë duke treguar mëvetësinë e tyre”.

“Sot 113 vite më pas në mënyrë simbolike në ngremë flamurin për të treguar mirënjohje të gjithë atyre patriotëve që kontribuuan në identitetin kombëtar të Lushnjës dhe gjithë Shqipërisë”, tha Sefa duke uruar qytetarët për festën e flamurit.

Ndërsa deputeti i Lushnjës, Elton Korreshi shprehu mirënjohjen për patriotët lushnjarë që kontribuuan në ngritjen e flamurit në këtë qytet të cilët një ditë më pas delegatët u bashkuan më datë 28 në Vlorë.

Ngritja e flamurit në qytetin e Lushnjës është bërë më 27 nëntor, një
ditë para shpalljes së pavarësisë në Vlorë. Ceremonia e ngritjes së flamurit më 27 nëntor 1912, u shoqërua edhe me dërgesën e dy delegatëve nga Lushnja, që do të shoqëronin Ismail Qemalin drejt Vlorës.

Marrë nga ATSH