Florenc Doka mori sot zyrtarisht detyrën si kryetar i bashkisë së Cërrikut.

Në ceremoninë e organizuar me këtë rast ishte i pranishëm edhe ministri i Bujqësisë dhe Zhvillimit Rural, Andis Salla, si dhe këshilltarët bashkiakë.

Në një postim në rrjetet sociale Salla shprehu besimin se Doka do të jetë një kryebashkiak për të gjithë, i cili me përkushtim dhe përgjegjshmëri do t’i shërbejë çdo banori.

“Në drejtim të punëve që i shërbejnë komunitetit, jam i bindur se Florenci do të vazhdojë rrugën e nisur për më shumë investime dhe zhvillim për çdo familje të Cërrikut, në rrugën tonë të pandalshme drejt familjes së madhe europiane”, tha Salla.

Në zgjedhjet e pjesshme vendore të 9 nëntorit Florenc Doka mori 6201 vota, kundrejt kandidatëve Eligert Hima i Lëvizjes Shqipëria Bëhet që mori 1275 vota dhe Amarildo Hoxha, kandidat i propozuar nga zgjedhësit që mori 1888 vota.

Burimi ATSH