Komisioni Evropian kërkon që Shqipëria të reformojë kuadrin ligjor për të rritur transparencën e pronësisë së mediave.

KE publikoi sot progresraportin e vitit 2025 për Shqipërinë ku vëren se, sa i përket lirisë së shprehjes, Shqipëria ka një nivel të kufizuar përgatitjeje në këtë fushë.

Pavarësia dhe pluralizmi i medieve vazhdojnë të ndikohen nga interesat biznes-politike, mungesa e transparencës së financimit, koncentrimi i pronësisë dhe kushtet e pasigurta për gazetarët. Megjithatë, dialogu i strukturuar mes institucioneve dhe aktorëve të medias si dhe masat për sigurinë e gazetarëve kanë qenë zhvillime pozitive, thuhet në progres raport.

Sipas progresraportit, Shqipëria duhet të reformojë kuadrin ligjor dhe rregullator për të rritur transparencën e pronësisë së mediave, pluralizmin, pavarësinë editoriale, dhe për të hequr ndëshkimet penale për shpifje dhe ofendim.

Vendi duhet të sigurojë zero tolerancë ndaj intimidimit të gazetarëve dhe ndjekje të efektshme të sulmeve, duke rritur kapacitetet e organeve ligjzbatuese dhe duke zbatuar standardet e të drejtave të njeriut si dhe të përmirësojë kushtet e punës së gazetarëve, duke forcuar mbrojtjen e të drejtave të tyre sociale dhe duke siguruar zbatimin e Kodit të Punës, nënvizon progres raporti.