Më 25–26 tetor, He Lifeng, zëvendëskryeministër dhe përfaqësues kryesor i palës kineze për çështjet tregtare, zhvilloi bisedimet ekonomike dhe tregtare midis Kinës dhe Shteteve të Bashkuara në Kuala-Lumpur të Malajzisë me sekretarin amerikan të Thesarit, Scott Bessent, dhe Përfaqësuesin Tregtar të ShBA-së, Jamieson Greer.

Të dyja palët, duke u udhëhequr nga konsensusi i rëndësishëm i arritur gjatë bisedave telefonike të këtij viti midis dy krerëve të shtetit, zhvilluan shkëmbime të sinqerta, të thelluara dhe konstruktive mbi një sërë çështjesh të rëndësishme ekonomike dhe tregtare, përfshirë masat e ShBA-së sipas Seksionit 301 që vendosin tarifa portuale mbi transportin detar dhe industrinë e ndërtimit të anijeve, zgjatjen e mëtejshme të pezullimit të tarifave të ndërsjella, çështjen e tarifave të fentanilit dhe bashkëpunimin në fushën e kontrollit të fentanilit, tregtinë e produkteve bujqësore dhe kontrollin e eksporteve.

Palët arritën një konsensus fillestar për shqetësimet e ndërsjella dhe ranë dakord të përcaktojnë më tej detajet specifike, duke ndjekur procedurat e brendshme të miratimit në vendet e tyre.

He Lifeng theksoi se thelbi i marrëdhënieve ekonomike dhe tregtare midis Kinës e Shteteve të Bashkuara është bashkëpunimi me përfitime të ndërsjella. Nëse të dyja palët bashkëpunojnë, mund të përfitojnë; nëse përplasen, dëmtohen që të dyja. Ruajtja e zhvillimit të qëndrueshëm të marrëdhënieve tregtare dypalëshe është në përputhje me interesat themelore të të dy vendeve e popujve të tyre, si edhe me shpresat e bashkësisë ndërkombëtare. Lidhur me mosmarrëveshjet dhe tensionet gjatë bashkëpunimit ekonomik dhe tregtar, të dyja palët duhet të udhëhiqen nga parimet e respektit të ndërsjellë, bashkëjetesës paqësore dhe bashkëpunimit me përfitime të përbashkëta, duke gjetur nëpërmjet dialogut dhe konsultimeve të barabarta mënyra të përshtatshme për zgjidhjen e shqetësimeve të ndërsjella.

Rezultatet e bisedimeve tregtare nuk janë arritur lehtë dhe duhet të ruhen nga të dyja palët. He shprehu shpresën që pala amerikane do të ecë në të njëjtin drejtim me palën kineze, duke zbatuar me përpikëri konsensusin e rëndësishëm të arritur gjatë bisedave ndërmjet dy krerëve të shtetit dhe rezultatet e bisedimeve ekonomike dhe tregtare të zhvilluara gjatë këtij viti, për të forcuar besimin e ndërsjellë, për të menaxhuar dallimet, për të zgjeruar bashkëpunimin me përfitime të përbashkëta dhe për t’i ngritur marrëdhëniet tregtare në një nivel më të lartë.

Pala amerikane u shpreh se marrëdhëniet ekonomike dhe tregtare ShBA–Kinë janë marrëdhënie me ndikim global dhe ShBA-ja është e gatshme të zgjidhë dallimet dhe të forcojë bashkëpunimin me Kinën mbi bazën e barazisë dhe respektit, për të arritur zhvillim të përbashkët.

Të dyja palët ranë dakord që, nën udhëheqjen strategjike të udhëheqësve të të dy vendeve, të shfrytëzojnë plotësisht mekanizmin e bisedimeve tregtare Kinë–ShBA, të mbajnë komunikim të ngushtë mbi çështjet me interes të ndërsjellë në fushën ekonomiko-tregtare dhe të promovojnë zhvillimin e shëndetshëm, të qëndrueshëm e afatgjatë të marrëdhënieve tregtare Kinë-ShBA, duke sjellë përfitime për popujt e të dy vendeve dhe duke kontribuuar në lulëzimin global.

Burimi CGTN