Ministri i Bujqësisë dhe Zhvillimit Rural, Andis Salla, vizitoi sot fermën blegtorale të Rodolf Velos në Gradisht, e ngritur në vitin 2023, e cila po shënon zgjerim të ndjeshëm të aktivitetit falë mbështetjes nga Skema Kombëtare e Investimeve 2024.

Aktualisht në këtë fermë mbarështohen rreth 300 krerë dele, ndërsa me ndërtimin e një stalle të re për të imta, me standarde bashkëkohore higjieno-sanitare, kapaciteti pritet të rritet deri në 400 krerë.

Qumështi i freskët i prodhuar çdo ditë përpunohet në baxhon e vetë fermës, ku transformohet në produkte bulmetore dhe nënprodukte me cilësi të lartë, duke krijuar një zinxhir të plotë vlerash që nis nga ferma dhe përfundon te konsumatori.

Ministri Salla vlerësoi përpjekjet e fermerit për zgjerimin e veprimtarisë dhe theksoi se mbështetja për investime në sektorin blegtoral mbetet prioritet i politikave të qeverisë për zhvillimin rural dhe rritjen e prodhimit vendas.

Burimi ATSH