Shqipëria po shënon hapa të rëndësishëm drejt zhvillimit të inovacionit, digjitalizimit dhe integrimit europian, duke u renditur ndër vendet udhëheqëse të rajonit me reforma konkrete dhe politika të qarta në këtë drejtim.

Ministrja e Ekonomisë dhe Inovacionit, Delina Ibrahimaj, mori pjesë sot në Forumin Ndërkombëtar InnoVision 2025, organizuar nga Korporata e Investimeve Shqiptare dhe Durana Tech Park, si një aktivitet paralel i Forumit të Investimeve EU-WB6 (Bashkimi Europian-Ballkani Perëndimor).

Ministrja Ibrahimaj theksoi rëndësinë strategjike që inovacioni dhe teknologjia kanë për zhvillimin ekonomik dhe afrimin me standardet e Bashkimit Europian.

“Shqipëria po udhëheq me reforma konkrete në digjitalizim, inovacion dhe zhvillim të qëndrueshëm. Sot, 95% e shërbimeve publike janë online, kemi mbështetur 172 startup-e dhe jemi duke zhvilluar Parkun Teknologjik Durana, që synon të bëhet qendra e re e inovacionit në rajon”, u shpreh ministrja.

Ibrahimaj nënvizoi se e ardhmja e Shqipërisë është dixhitale, e gjelbër dhe europiane, dhe se angazhimi institucional për modernizimin teknologjik do të vijojë me ritme të qëndrueshme.

Forumi InnoVision 2025 mblodhi së bashku vendimmarrës, drejtues biznesesh dhe inovatorë nga rajoni dhe Bashkimi Europian për të diskutuar mbi të ardhmen e teknologjisë dhe zhvillimin e parqeve të inovacionit në Ballkanin Perëndimor, duke u bazuar në modelet më të mira europiane të parqeve teknologjike dhe politikave të inovacionit.

Burimi ATSH