Artisti me famë botërore, Angjelin Preljocaj do të vijë sërish në Tiranë për të qenë protagonist në skenën e Festivalit të Baletit Bashkëkohor nga data 9 deri në 25 tetor.

Ministrja e Arsimit, Mirela Kumbaro ndau në rrjetet sociale mesazhin e artistit Preljocaj, ndërsa tha se “ky festival i vjen kryeqytetit si një dialog artistik mes trupave që lëvizin, dritës që ngjall emocione dhe audiencës që përjeton poezinë e trupit në çdo hap, me performanca dhe eksperienca që sfidojnë kufijtë e gjuhës trupore”.

Kumbaro u shpreh se “siç Angjelini, të cilin Ismail Kadare e quante tamam “Kushëriri i Engjëjve”, di më së miri ta bëjë”.

Ylli botëror i koreografisë, shqiptaro-francezi Angjelin Preljocaj në videomesazh fton pjesëmarrësit për të marrë pjesë në një festë të vërtetë të vallëzimit modern, në 10 hapësira publike surprizë të kryeqytetit.

“Këtë vit, krahas disa prej shfaqjeve më emocionuese të Europës në Teatrin Kombëtar të Operës dhe Baletit, Teatrin Kombëtar, Teatrin “Metropol”, Teatrin e Kukullave dhe skena të tjera, Festivali do të hapet për të gjithë qytetin me një shfaqje të re për publikun falas”, tha Preljocaj.

Angjelin Preljocaj, i lindur në Francë nga prindër shqiptarë, i nisi studimet me baletin klasik përpara se të merrej me baletin modern, duke arritur të interpretonte në skenat botërore. Koreografia e tij përshkruhet si interpretim i baletit klasik dhe modern.

Burimi ATSH