Qyteti i Korçës është në garë për titullin “Qyteti Europian i Sportit 2026”.

Kryetari i bashkisë së Korçës, Sotiraq Filo, presidenti i Komitetit Olimpik Kombëtar Shqiptar, Fidel Ylli, zëvendësministri i Sportit, Endrit Hoxha, mirëpritën në Korçë delegacionin e ACES Europe, organizata jofitimprurëse me seli në Bruksel, e cila çdo vit jep njohjet e Kryeqytetit, Qytetit, Komunitetit dhe Qytezës Sportive Evropiane.

Në një postim në rrjetet sociale Filo tha se “delegacioni i ACES Europe inspektoi nga afër infrastrukturën sportive dhe ndoqi prezantimin mbi traditën dhe vizionin tonë për sportin”.

“Korça është qytet me traditë të pasur sportive dhe me infrastrukturë moderne që po zgjerohet me projekte madhore, nga rikonstruksioni i Pallatit të Sportit, deri te ndërtimi i stadiumit të ri. Ne e shohim sportin si pjesë të jetës së përditshme, duke mbështetur si ekipet profesioniste, ashtu edhe sportin masiv, akademitë e të rinjve dhe aktivitetet amatore”, theksoi Filo.

Sipas tij, ky aplikim është një angazhim për të forcuar më tej rolin e sportit në edukim, shëndet dhe socializim.

“Jam i bindur se Korça e meriton këtë vlerësim dhe besoj se viti 2026 do ta gjejë qytetin tonë si “Qyteti Europian i Sportit””, tha Filo.

Ky titull pritet të ketë një ndikim të madh edhe në promovimin e qytetit, pasi do të zhvillohen shumë aktivitete sportive.