Gjimnazi “Kostandin Kristoforidhi” në Elbasan i është nënshtruar një rikonstruksioni tërësor, falë investimit të përbashkët të Ministrisë së Arsimit dhe Sportit dhe Bashkisë Elbasan.

Shkolla tashmë ofron kushte moderne mësimi për mbi 650 nxënës dhe mësues, me kapacitete të shtuara që përfshijnë 14 klasa të reja, laboratorë bashkëkohorë, si dhe një palestër të re me fushë sportive të integruar.

Ministrja e Arsimit dhe Sportit, Ogerta Manastirliu, theksoi rëndësinë e këtij investimi në funksion të përmirësimit të infrastrukturës arsimore dhe rritjes së cilësisë së mësimdhënies. Ajo bëri me dije se hapësirat sportive do të jenë të aksesueshme edhe për komunitetin lokal, duke i kthyer ato në qendra shërbimi dhe aktivitetesh për të rinjtë jashtë orarit mësimor.

Ky projekt është pjesë e programit kombëtar për modernizimin e infrastrukturës arsimore në të gjithë vendin, duke vënë në qendër të vëmendjes standardet e sigurisë, mjediset funksionale dhe nxitjen e aktiviteteve sportive e sociale brenda shkollave.

Burimi ATSH