Kryeministri Edi Rama reagoi sot ndaj protestave të fundit në Tiranë, duke kritikuar dhunën, gjuhën kërcënuese dhe pretendimin e protestuesve për të folur në emër të të gjithë popullit.

Në një mesazh drejtuar qytetarëve shqiptarë, Rama e përshkroi grupimin e protestuesve si një bashkim individësh, grupesh sociale dhe partish politike që nuk kanë lidhje me njëra-tjetrën.

“Një mishmash kategorish, ku janë mbledhur bashkë individë dhe grupe sociale, parti politike që s’kanë asnjë lidhje me njëra-tjetrën. Ashtu siç do të përsëritet këtu, përzihen interesa të huaja, para të zeza dhe krimi i organizuar. Ky mishmash ka një devizë për bashkuesit: që kur tribuna e flamingove u kthye në një vend grumbullimi sorrash dhe korbash”, tha Rama.

“Në emër të popullit, ne nuk e durojmë më këtë sistem. Ne nuk e duam më këtë qeveri, ne nuk e pranojmë më këtë kryeministër.” Ja një keqkuptim i madh, shumë i madh. Fatmirësisht, askush nuk është populli, përveç vetë popullit. Dhe ky mishmash ka keqkuptuar gjithçka, duke marrë peng një pjesë të tij, në emër të popullit të tërë, me fjalë dhe ekrane televizive të korruptuara, që i bëjnë hosana dhunës dhe vulgaritetit”, theksoi Rama.

Kryeministri theksoi se, një pjesë e protestuesve përpiqen të marrin vëmendjen publike dhe të paraqesin kërkesat e tyre si vullnetin e përgjithshëm të qytetarëve.

“Nuk ka si të flasë në emër të popullit. Dhe nuk ka asnjë autorizim për të folur në emër të popullit. Sepse populli flet vetë, me votën e tij. Asnjë turmë, as unë vetë dhe as askush tjetër, por vetëm vetë ai, sovrani, i jep mandatet për të folur dhe për të vendosur në emrin e tij. Kjo është marrëveshja themelore e demokracisë, ashtu siç është e drejta e secilit, në demokraci, të flasë në emrin e vet personal apo në emër të grupimit, organizatës, shoqatës, sindikatës apo komunitetit ku bën pjesë, të kërkojë atë që mendon se i takon, të dalë në rrugë, të protestojë dhe të bëjë grevë për atë që mendon se i takon”, tha Rama.

Kryeministri theksoi se, liria dhe e drejta e të gjithë atyre që duan t’u imponojnë të tjerëve mendimet, idetë, kërkesat dhe bindjet e tyre, mbaron aty ku nis liria dhe e drejta e të tjerëve për të pasur mendimet, idetë, qëndrimet dhe bindjet e tyre.

“Ky është kufiri që ndan ligjin e bashkëjetesës demokratike nga ligji i totalitarizmave apo i xhunglës, ku sundojnë dhuna, forca, frika dhe nënshtrimi pa kushte”, tha Rama, duke shtuar se, “këtë kufi, pikërisht këtë kufi, e kanë vërtetuar me dhunë fashistët dhe komunistët, në emër të popullit, kundër sistemit, me dhunë dhe terror. Pastaj, çfarë i sollën popullit dhe vendit, e dimë mirë të gjithë. Ose, të paktën, e dinë të gjithë ata që njohin historinë dhe nuk ngatërrojnë Ismail Qemalin me Ismail Kadarenë”.

“E pyes veten shumë këto ditë: a është e mundur të mirëkuptohet e gjithë kjo furi dhe dhunë verbale, kërcënime, sharje, presione dhe shantazhe që gëlojnë në rrjetet sociale dhe në komunikimet digjitale, ndaj kujtdo që nuk i bindet agresionit të imponuar nga kjo turmë? Jo vetëm ndaj atyre që nuk i binden, por edhe ndaj atyre që nuk i bëjnë hosana kësaj turme. Një turmë që nuk kërkon thjesht të dëgjohet, por pretendon të mbështetet pa kushte në kuturisjen e saj antidemokratike, ku, në fjalorin e vet bazik, në emër të rinisë, studentëve dhe të ardhmes, nuk ka asnjë fije respekti. Pra, asnjë normë sjelljeje, asnjë standard komunikimi, asnjë formë dialogu apo ballafaqimi”, tha Rama.

Kryeministri theksoi se i rezulton e pamundur ta mirëkuptojë këtë sulm frontal ndaj etikës së qytetërimit.

“Mua, personalisht, më rezulton e pamundur ta mirëkuptoj këtë sulm frontal ndaj etikës së qytetërimit tonë, ku, pavarësisht deficitit demokratik që ka kultura jonë e bashkëjetesës, dhe ku të gjithë kemi pjesën tonë të fajit, pa diskutim, as tradita familjare shqiptare, as normat demokratike të bashkëjetesës dhe as civilizimi europian nuk kanë asgjë të përbashkët me përmbajtjen gjerësisht vulgare të këtij sulmi të dhunshëm”, tha ai.

“Në emër të rinisë, studentëve dhe të ardhmes, ku me ta, si shtet e si popull, gjuha nuk është më thjesht gjuhë, por kocka thyhen. Nuk thyhen vetëm mendimet e figurave të ekraneve televizive, por thyhen edhe xhamat, digjen bankat dhe sulmohen institucionet. Dhe kjo më ka çuar të shkoj në çdo skaj dhe skutë të Shqipërisë, ku kam takuar pafundësisht njerëz dhe kam parë pafundësisht realitete familjare, njerëz të zakonshëm të këtij vendi”, theksoi Rama.

Por, shtoi ai, “mes pafundësisë së dritave dhe hijeve të realitetit tonë, kam parë qartësisht se sa shumë ndryshon, sa më e thellë në shpirtin e saj dhe sa më e kthjellët në mendjen e saj është Shqipëria që nuk përfaqësohet. As nga kjo turmë agresorësh të hapësirës publike, qoftë në rrugët e Tiranës, qoftë në pasqyrat e iPhone-ve, dhe as nga ekranet e korruptuara televizive”.

“Atje, një lukuni ish-profesionistësh të rrjeteve dhe personazhesh televizivë jetojnë në luksin e vazhdueshëm, ndërsa javët e fundit janë bërë një kor i të dehurve nga kënaqësia e dhunës. Të tërbuar, në rrugë dhe në ekrane, thonë se duan të qeverisin”, tha Rama.

Burimi ATSH