Në kuadër të fushatës së ndërgjegjësimit për sigurinë ushqimore dhe formalizimin e ekonomisë, ministrja e Bujqësisë dhe Zhvillimit Rural, Anila Denaj, së bashku me ministrin e Financave, Petrit Malaj, dhe drejtorin e Përgjithshëm të Tatimeve, Ilir Binaj, zhvilluan takime me tregtarë të produkteve ushqimore.

Siguria ushqimore dhe formalizimi i të gjithë zinxhirit tregtar nga ferma në tryezë është një domosdoshmëri, e cila nuk pret më për një vend që synon të ulet në tryezën e Bashkimit Europian deri në fund të kësaj dekade.

Në këtë kuadër të sigurisë ushqimore, do të ndalohet qumështi, mishi dhe prodhimet e bulmetit pa faturë.

Nga java e ardhshme çdo prodhim i tillë do të sekuestrohet, sepse përbën një kërcënim direkt të shëndetit sidomos me temperaturat e larta dhe subjektet tregtuese do të gjobiten skajshëm.
Gjatë takimeve, u theksua rëndësia e bashkëpunimit ndërmjet institucioneve shtetërore dhe bizneseve tregtare për të garantuar produkte të sigurta dhe të gjurmueshme për konsumatorët.

U theksua se zbatimi i standardeve ligjore dhe teknike është thelbësor për një zinxhir të plotë sigurie ushqimore, nga ferma deri te tryeza e qytetarëve.

“Fatura fiskale dhe Certifikata Veterinare janë elementë thelbësorë për sigurinë ushqimore. Nga ferma te tryeza, çdo hallkë e zinxhirit duhet të garantojë cilësinë dhe sigurinë e produktit. Tregtarët, institucionet dhe fermerët kanë përgjegjësi të përbashkët ndaj qytetarëve për të ofruar produkte të kontrolluara dhe të sigurta”, u shpreh ministrja Denaj.

Nga ana e tij, ministri i Financave, Petrit Malaj, vuri në dukje rëndësinë e ndërgjegjësimit të shitësve me pakicë për domosdoshmërinë e sigurimit të faturës së blerjes, duke e konsideruar këtë praktikë jo vetëm një kërkesë për formalizimin e biznesit, por mbi të gjitha një mjet kyç për sigurinë ushqimore.

“Nëpërmjet faturës, garantohet gjurmueshmëria e produktit nga origjina deri në tryezën e konsumatorit”, theksoi ai.

Në këtë kuadër, iu drejtua një apel të gjitha subjekteve tregtare që të respektojnë detyrimin për të siguruar faturën në momentin e blerjes së mallrave nga ferma, si një akt që përmbush jo vetëm një kërkesë ligjore, por edhe një përgjegjësi profesionale dhe qytetare.

Fushata informuese do të vijojë në të gjithë vendin, me qëllim rritjen e ndërgjegjësimit dhe forcimin e sistemit të kontrollit dhe gjurmueshmërisë së produkteve ushqimore, si pjesë e prioriteteve të Qeverisë për mbrojtjen e shëndetit dhe interesit të qytetarëve.

Burimi ATSH