Ministrja e Bujqësisë dhe Zhvillimit Rural, Anila Denaj, mori pjesë sot në takimin për Konsultimin Informal të Organizatës së Ushqimit dhe Bujqësisë së Kombeve të Bashkuara (FAO) për Evropën dhe Azinë Qendrore.

Ky takim, i cili shërben si përgatitje për sesionin e 35-të të Konferencës Rajonale për Evropën, mblodhi përfaqësues nga vendet anëtare për të ndarë përvoja dhe ide mbi përparimin drejt Objektivave të Zhvillimit të Qëndrueshëm (OZHQ).

Ministrja Denaj, gjatë takimit theksoi se u diskutua gjerësisht mbi sfidat dhe mundësitë që po përjetojnë vendet e rajonit, prioritetet për periudhën 2026–2027, rolin e komisioneve teknike dhe qasjet e reja për transformimin e sistemeve agroushqimore, të cilat qëndrojnë në qendër të agjendës së zhvillimit të qëndrueshëm.

Ajo nënvizoi rëndësinë e bashkëpunimit me FAO në fuqizimin e politikave kombëtare për bujqësinë dhe zhvillimin rural, duke shtuar se Shqipëria mbetet e angazhuar për modernizimin dhe qëndrueshmërinë e sektorit agroushqimor, si pjesë e përpjekjeve të saj për t’u afruar me standardet e Bashkimit Europian.

“FAO, me një histori 80-vjeçare, mbetet një partner strategjik për Shqipërinë, veçanërisht në çështje që lidhen me menaxhimin e burimeve natyrore dhe përballimin e ndikimeve të ndryshimeve klimatike”, u shpreh Denaj.

Takimi rajonal vjen në një kohë kur vendet po përballen me sfida komplekse të lidhura me sigurinë ushqimore, ndotjen mjedisore dhe efektet e krizave globale, duke e bërë bashkëpunimin rajonal dhe ndërkombëtar më të domosdoshëm se kurrë më parë.

Burimi ATSH