Kryeministri Edi Rama, njëherazi edhe kryetar i Partisë Socialiste, deklaroi sot se anëtarësimi i Shqipërisë në BE në 2030 është objektiv i mandatit të tij të 4-rt në krye të qeverisë.

“Nëse ne realizojmë anëtarësimin kemi realizuar një mision historik. Kemi 35 vite që ne i biem vërdallë dhe asnjëherë ata nuk na e kanë hapur derën. Tani e kanë hapur derën”, deklaroi Rama gjatë një interviste televizive.

Rama bëri të ditur se Bashkimi Europian po negocion me Shqipërinë.

Ai theksoi se asnjë forcë tjetër politike, përveç PS, nuk ka kapacitete të bëjë integrimin e vendit në Bashkimin Europian.

“Që Shqipëria të ketë kapacitet të negociojë me BE duhet vetëm me Partinë Socialiste. Ka një gjë, kjo nuk është një garë që ne të marrim një rrugë dhe të shkojmë atje, por një garë me veten që ne të bëhemi një vend që duke mbyllur negociatat merr një “certifikatë” që është shtet. Ky është një proces shtetbërës dhe në ndërsa je në negociata, ti ndërkohë ndërton shtetin brenda vetes”, u shpreh kryeministri.

Shqipëria, vijoi Rama, sot është në nivel tjetër dhe i pari vend të cilit i jepet hapja e negociatave në 2024-n dhe mbyllja në 2027-n.

Burimi ATSH