Në kuadër të projektit pilot që do të zbatohet në Njësinë Administrative nr. 10, Tiranë dhe në bashkinë Vorë, KQZ realizoi testimin operacional të Pajisjeve Elektronike të Votimit dhe Numërimit (PEVN).

KQZ njoftoi se “u përzgjodhën 3% e pajisjeve për të simuluar procesin e hapjes, votimit, mbylljes dhe transmetimit të rezultatit, duke verifikuar përputhshmërinë e kritereve të përcaktuara nga KQZ”.

“Garantojmë qytetarët se pajisjet sigurojnë 100% fshehtësinë e votës. Nuk ekziston mundësia që vota e qytetarëve të identifikohet apo të zbulohet nga askush – as nga KQZ, as nga kompania që ka prodhuar pajisjet”, njoftoi KQZ.

Sipas KQZ-së, Pajisja Elektronike e Votimit dhe Numërimit ofron votim të thjeshtë dhe të sigurt; fshehtësi të plotë të votës; verifikim nga vetë zgjedhësi i votës së printuar, para se ajo të depozitohet në kuti; software me standarde të larta sigurie dhe ndërfaqe të lehtë për përdoruesit.

KQZ bëri të ditur që për “të familjarizuar qytetarët me këtë teknologji, kemi vendosur qendra informimi në zonat ku do të aplikohet votimi elektronik. Çdokush mund të shkojë, të provojë pajisjet dhe të simulojë votimin”.

Në zgjedhjet parlamentare të 11 majit, pajisjet do të përdoren në 44 qendra votimi në bashkinë Vorë; 31 qendra votimi në njësinë administrative nr. 10, Tiranë.

Testimi u zhvillua në praninë e vëzhguesve ndërkombëtarë, përfaqësuesve të shoqërisë civile dhe medias, duke garantuar një proces të hapur dhe transparent.

Burimi ATSH