Ministrja e Turizmit dhe Mjedisit, Mirela Kumbaro së bashku me kryeministrin Edi Rama po mbajnë sot një takim me turoperatorët dhe kryetarët e bashkive bregdetare për përgatitjet për sezonin veror 2025.

Në fjalën e tij në këtë takim kryebashkiaku i Lezhës, Pjerin Ndreu solli ekperiencën e re të menaxhimit të plazheve nga bashkia e Lezhës. Përveç fokusimit tek hoteleritë duke u dhënë përparësi atyre që kanë struktura hoteliere, problem ngelen strukturat që mbeten bosh, që nga pastërtia, rojat e plazhit, banjot publike, tabelat informuese për plazhet publike etj.

Ai tha se bashkia e Lezhës ka ngritur një ndërmarrje publike, “Lezha Invest”, ku janë adresuar këto problematika, për të siguruar një cilësi shërbimi më të lartë se privati. Sipas Ndreut do të jenë 3 qendra me 30 punonjës sezonalë. Janë përcaktuar nevojat e stacioneve të plazhit te zona e Ranës së Hedhun, Qendër Shëngjin e Kune-Tale. Fleksibël do të jetë përdorimi i shezlongëve, për t’i marrë me qira ose për t’i blerë nga bashkia. Ato do të ofrohen me pagesë modeste, kundrejt zgjedhjes së lirë të qytetarëve që do të pushojnë në bregdetin e Lezhës. Do të jetë në zgjedhjen e qytetarit nëse do të marrë me qira çadër e shezlong, apo do të hyjë pa to. Shezlongët me çadrën do jetë nga 500 deri në 300 lekë. Ky organizim, mendohet se do të sjellë edhe fitime për bashkinë. Për dy-tre vjet mendohet të krijohen edhe mundësitë e blerjes së mjeteve të pastrimit të reja për bashkinë.

Ndreu kërkoi bashkëpunimin e strukturave shtetërore për mbarëvajtjen e mirëmenaxhimit të plazheve publike. Ky vit është një test për të cilin ai shprehu besimin se do të kalohet me sukses.

Burimi ATSH