Agjencia për Zhvillimin Bujqësor dhe Rural dhe agjencia homologe kroate (PAAFRD) nënshkruan një marrëveshje bashkëpunimi në Zagreb, Kroaci, e cila synon shkëmbimin e informacionit, eksperiencës dhe metodave të përdorura në zhvillimin e sistemeve operacionale për zbatimin e fondeve të BE-së.

Marrëveshja parashikon organizimin e përbashkët të konferencave, seminareve dhe trajnimeve për menaxhimin e fondeve të BE-së, pagesat direkte, zhvillimin rural dhe masat e tregut.

Në kuadër të kësaj marrëveshjeje, një delegacion i përbërë nga stafi i Ministrisë së Bujqësisë dhe Zhvillimit Rural (MBZHR) dhe Agjencisë për Zhvillim Bujqësor dhe Rural (AZHBR), kryesuar nga Drejtoresha e Përgjithshme, Ardita Kuçi, zhvilloi një vizitë studimore pranë Agjencisë Homologe në Zagreb. Vizita studimore, mbështetur nga GIZ, pati për qëllim shkëmbimin e eksperiencave mbi sistemet për regjistrimin dhe menaxhimin e të dhënave të parcelave bujqësore (LPIS dhe ARKOD).

Delegacioni shqiptar u njoh me funksionimin e sistemeve të menaxhimit të pagesave (IACS) dhe monitorimit të aktivitetit bujqësor (AMS), duke marrë pjesë në disa trajnime praktike në zyrat qendrore dhe rajonale të PAAFRD.

Ky partneritet është një hap i rëndësishëm drejt modernizimit të shërbimeve bujqësore në Shqipëri, në përputhje me standardet dhe praktikat më të mira europiane.

Burimi ATSH