Kryeministri Edi Rama deklaroi sot se Shqipëria ka inflacionin më të ulët në rajon, ndërkohë që çmimi i energjisë është ulur me 10.5%.

Duke iu përgjigjur komentuesve në rrjetet sociale, Rama kujtoi se “çmimet nuk i ngre qeveria dhe as i ul qeveria në asnjë vend demokratik”.

“Në Shqipëri, dhe këtë nuk e them unë, por e thonë të gjitha të dhënat e organizmave ndërkombëtare ne kemi pasur inflacionin më të ulët në rajon, rritjen më të ulët të çmimeve në rajon”, tha ai.

Ndërsa lidhur me çmimin e energjisë, Rama tha se ulja nuk konsiderohet qesharake për ata që realisht paguajnë faturën e energjisë në Shqipëri.

“Nuk u vjen për të qeshur sepse është 10.5 % ulja e çmimit të energjisë. Jam shumë krenar për këtë sepse është një ulje atipike në një periudhë kohe prej disa vitesh që askush nuk ul, por vetëm ngre çmimin e energjisë”, tha Rama.

Burimi ATSH