Ministri i Ekonomisë, Kulturës dhe Inovacionit, Blendi Gonxhja si dhe Komisioneri për të Drejtën e Informimit dhe Mbrojtjen e të Dhënave Personale, Besnik Dervishi nënshkruan sot udhëzimin e përbashkët “Për të dhënat e hapura dhe ripërdorimin e informacionit të sektorit publik”, me qëllim miratimin e licencave për ripërdorimin e të dhënave të hapura në Republikën e Shqipërisë.

Ministri Gonxhja e cilësoi udhëzimin një hap drejt transparencës dhe qasjes së lirë në informacion.

“Një hap i rëndësishëm drejt inovacionit, transparencës dhe fuqizimit të komunitetit me akses në informacion të hapur”, u shpreh Gonxhja.

Sipas tij, licencat, të unifikuara me standardet e Bashkimit Evropian (Creative Commons CC), do të garantojnë siguri juridike dhe lehtësi në përdorimin e të dhënave të hapura.

“Të gjitha informacionet do të jenë të shoqëruara me licenca elektronike dhe të disponueshme në portalin kombëtar opendata.gov.al”, bëri të ditur ai.

Burimi ATSH