Zëvendëskryeministrja, Belinda Balluku, njëherësh ministre e Infrastrukturës dhe Energjisë bëri të ditur sot se ulja e çmimit të energjisë nuk është një masë e marrë nga ERE vetëm për një vit, pasi afati deri më 31 dhjetor është procedurë.

“Nuk është masë 1-vjeçare. ERE çdo fundviti ka detyrim të publikojë çmimin e vitit pasardhës, dhe këtë e ka bërë në dhjetë vitet e fundit. Nuk është për një vit. Është procedurë, e ka bërë këtë në çdo fundvit dhe ka miratuar 9.5 lekë për dhjetë vite”, tha ajo.

Balluku deklaroi se çmimi i energjisë përmes sakrificash ka qëndruar i pandryshuar për një dekadë.

Sipas saj, me vendimin e ERE-s për uljen e çmimit të energjisë përfituan 1 milion e 70 mijë abonentë ose 95 % e abonentëve.

Ajo hodhi poshtë akuza e opozitës për ulje të çmimit për efekt elektoral.

“Flasim për 1 milion e 70 mijë abonentë që përfitojnë dhe në thelb nuk ka asnjë gjë për fushatë. Ne kemi pasur fushatë edhe në 2017, edhe në 2021, por kemi qenë të përgjegjshëm duke diutr dobësitë e sistemit”, tha ajo.

Nga ana tjetër, ajo vuri në dukje se familjet mund të tejkalojnë fashën vetëm përgjatë muajit janar. “Vetëm rreth 130 mijë familje shkojnë në cakun e 700 kW”, tha ajo.

“PS dhe qeveria Rama nuk ka përdorur kurrë energjinë për arsye elektorale. Opozitë sulmon sipas modelit të saj”, tha Balluku teksa kujtoi thirrjet e kreut të PD-së, për mospagesën e faturave të energjisë nga qytetarët.

Duke folur për investimet, Balluku bëri të ditur se OSHEE po punon për vendosjen e matësave inteligjentë, që do të zgjidhë një problematikë të vështirë të faturimit aforfe.

Ajo deklaroi se biznesi nuk përfiton nga kjo ulje.

Burimi ATSH