“Ne shpresojmë ta bëjmë Shqipërinë Europën e Ballkanit Perëndimor”, u shpreh sot Kryeministri Edi Rama në Bruksel pas konferencës së tretë ndërqeveritare me Bashkimin Evropian.

Në konferencën e përbashkët për shtyp me Péter Szijjártó, ministër i Punëve të Jashtme të Hungarisë, vend që mban Presidencën e Këshillit të BE-së, dhe Marta Kos, Komisionere për Fqinjësinë dhe Negociatat për Zgjerimin, Rama u shpreh se Shqipëria është e mirëpozicionuar që ta bëjë këtë, por duhet ky bashkëpunim dhe partneritet.

“Ne jemi të përkushtuar që të shikojmë me sytë e së ardhmes dhe jo me sytë e së shkuarës, që e ka parandaluar vendin tonë dhe rajonin dhe shumë vende në Ballkanin Perëndimor që të progresojnë aq shumë sa duhet”, tha Rama.

Kryeministri shprehu bindjen se “ne jemi në momentin më të mirë të historisë dhe Europa dhe BE është në momentin më të mirë për të kuptuar se sa vendet e Ballkanit Perëndimor janë të rëndësishme për të ardhmen e saj”.

“Ne do të bëjmë më të mirën tonë. Ky moment ka mbyllur diçka që ne kemi filluar ta dyshonim tashmë. BE ka një zemër dhe ne e kemi dëshmuar këtë. Nuk është aq e madhe, por është një fakt që është aty dhe që pulson dhe jeton”, tha Rama.