Ish-presidenti i Shqipërisë, Alfred Moisiu, feston sot 95-vjetorin e lindjes.

Presidenti Bajram Begaj, ka shprehur një urim për ish-kreun e shtetit, duke vlerësuar rolin dhe kontributin e tij në historinë e Shqipërisë.

Begaj vlerëson angazhimin e Moisiut që nga rreshtimi në radhët e Ushtrisë Nacional-Çlirimtare në adoleshencë deri në kontributet e tij si President, duke theksuar urtësinë, ekuilibrin dhe frymën përbashkuese që e ka shoqëruar çdo hap të tij.

“I dashur President Moisiu,
Kam kënaqësinë e veçantë që, me rastin e ngjarjes së gëzueshme të 95-vjetorit të datëlindjes Suaj, të bashkohem me familjarët, miqtë dhe dashamirësit Tuaj të shumtë për t’Ju transmetuar urimet e mia më të përzemërta për shëndet të plotë, jetë të gjatëdhe aktive.

Në rrugëtimin historik të shtetit shqiptar, Ju, i nderuar President Moisiu, keni dhënë kontribute të shumta e të çmuara, për të cilat populli shqiptar Ju vlerëson me konsideratë të lartë”, shkruan Begaj.

“Në moshën e adoleshencës Ju u rreshtuat në radhët e Ushtrisë Nacional-Çlirimtare të Shqipërisë, për t’u përfshirë më pas në angazhime të rëndësishme dhe përgjegjësi shumë të larta, duke kulmuar me postin e Presidentit të vendit. Në çdo hap që keni hedhur, Ju keni shkëlqyer!”, thekson Begaj.

“Ju kontribuuat me përgjegjësi gjatë ushtrimit të detyrës së Kreut të Shtetit, veçanërisht në kohë zhvillimesh të vështira, por edhe me urtësi, ekuilibër dhe frymë përbashkuese në konsolidimin e demokracisë, shtetit të së drejtës, parimit të të drejtave dhe lirive themelore, si dhe forcimit të imazhit ndërkombëtar të Shqipërisë.

Në këtë jubile mjaft të veçantë, të cilin ju e keni arritur me shumë përkushtim, punë të palodhur e atdhetari shembullore, duke u bërë model frymëzues për autoritetet shtetërore dhe politike shqiptare, është kënaqësi për mua t’Ju drejtohem me urimet më të përzemërta.”, përfundon mesazhi i Presidentit Begaj.

(ATSH)