Këshilli i Lartë i Prokurorisë zhvilloi një vizitë studimore të rëndësishme në Këshillin Suprem të Magjistratëve dhe Ministrinë e Drejtësisë së Francës, në Paris.

KLP u përfaqësua në këtë vizitë studimore nga Kryetarja Mirela Bogdani, këshilltarë ligjorë, Sekretari i Përgjithshëm dhe stafi administrativ.

Vizita, e organizuar dhe koordinuar përmes programit ‘EU4JUSTICE” në Shqipëri dhe “Expertise France”, ofroi një mundësi të çmuar për shkëmbim njohurish dhe zhvillim profesional. Takimi me disa nga anëtarët dhe ish-anëtarët e Këshillit Suprem të Magjistratëve në Francë, i mundësoi delegacionit shqiptar të fitojë një kuptim më të thellë mbi parimet dhe praktikat institucionale të një prej sistemeve të drejtësisë, më të konsoliduara në Evropë.

Delegacioni zhvilloi diskutime të detajuara me homologët francezë, duke përfituar njohuri të vlefshme mbi strukturën, funksionet e përditshme dhe procedurat e Këshillit Suprem të Magjistratëve. Theksi kryesor ishte mbi transparencën, integritetin dhe përgjegjshmërinë, parime themelore për një drejtësi të drejtë dhe efektive.

Gjatë vizitës, delegacioni u njoh gjithashtu me sistemin e avancuar të menaxhimit të çështjeve brenda Këshillit, një mjet që përmirëson rrjedhën e punës dhe rrit efikasitetin në proceset gjyqësore. Duke njohur vlerën e këtij sistemi, Bogdani nënvizoi angazhimin e KLP-së për të eksploruar përparime të ngjashme teknologjike dhe transparente për implementimin e tyre në Shqipëri.

Gjatë ditës së fundit në Paris, delegacioni shqiptar u mirëprit edhe nga përfaqësues të Ministrisë së Drejtësisë së Francës. Diskutimet në Ministri nënvizuan rëndësinë e bashkëpunimit ndërinstitucional ndërmjet Ministrisë, Sekretariatit të Përgjithshëm dhe Këshillit Suprem të Magjistratëve.

Delegacioni shqiptar përfitoi një panoramë të plotë të sistemit të drejtësisë franceze, duke përfshirë aktivitetet dhe procedurat kryesore të tij.

Bogdani shprehu mirënjohjen e saj ndaj ekipit të “EU4JUSTICE” dhe “Expertise France” për rolin e tyre në organizimin dhe koordinimin e vizitës.

“Në emër të KLP-së, dëshiroj të shpreh falënderimet e mia të sinqerta ndaj ekipit të EU4JUSTICE dhe Expertise France që bënë të mundur këtë vizitë studimore. Kjo vizitë përfaqëson një gur themeli për bashkëpunime të ardhshme mes sistemeve të drejtësisë të dy vendeve. Shkëmbimi i njohurive dhe praktikave të mira jo vetëm që rrit kapacitetet institucionale, por edhe forcon bazën për partneritete afatgjata që do të kontribuojnë në përpjekjet e Shqipërisë për integrim në BE,” u shpreh ajo.

Mbështetja e Francës, si anëtare kyçe e BE-së, tregon angazhimin për forcimin e sundimit të ligjit në Shqipëri. KLP vijon të punojë me transparencë, përgjegjshmëri dhe profesionalizëm për institucione më të forta dhe të drejta.

(ATSH)