Ministrja e Arsimit dhe Sportit, Ogerta Manastirliu zhvilloi një vizitë në Universitetin e Teknologjisë të Compiègne (UTC), në Qendrën e Inovacionit të këtij universiteti, në Compiègne, Francë.

Manastirliu e shoqëruar nga rektori i Universitetit Politeknik të Tiranës, prof. Akil Fundo dhe përfaqësues të këtij universiteti si dhe nga prof. Dritan Naçe nga UTC, vizituan laboratorët e kërkimit shkencor dhe platformat me të reja teknologjike të robotikës dhe makinave inteligjente të zhvilluara në këtë universitet përmes studimeve të thelluara në këto fusha dhe bashkëpunimit me biznesin.

“Njësitë e kërkimit shkencor të UTC-së janë një shembull i ekselencës akademi-biznes, një model që synojmë ta integrojmë përmes programit të ndërkombëtarizimit mes dy institucioneve”, tha Manastirliu në një postim në rrjetet sociale.

Ministrja Manastirliu u shpreh se “ky bashkëpunim do të sjellë në vitin e ardhshëm dhe hapjen e filialit të UTC në Universitetin Politeknik të Tiranës duke mundësuar për herë të parë hapjen e cikleve të para të studimit në inxhinieri kompjuterike dhe elektronike, për studentët shqiptarë dhe të huaj në vendin tonë dhe duke zgjeruar ofertën akademike dhe mundësimin e ofrimit të diplomave të përbashkëta”. (ATSH)