Kryeministri Edi Rama tha sot se më shumë se një milionë vizitorë kanë shkelur në sitet kulturore të shpërndara në të gjithë vendin, bashkë me kuriozitetin dhe motin e favorshëm në këto ditë të ngrohta të nëntorit. Turizmi vazhdon të shënojë shifra rekord në vendin tonë, duke e kthyer Shqipërinë në një atraksion absolut për të huajt dhe jo vetëm.

“Turistët vijojnë dhe në këto ditë me diell të nëntorit të vizitojnë sitet tona kulturore, të cilat përgjatë gjithë vitit kanë mikpritur 1,229,195 vizitorë”, shkruan Rama në postimin e tij në Facebook.

Trashëgimia kulturore dhe historike tërheq të huajt në vendin tonë, numri i të cilëve është shtuar ndjeshëm. Ky vit ka qenë një dëshmi e rëndësisë së përkushtimit ndaj trashëgimisë historike duke i paraprirë boom-it të turizmit kulturor që përkthehet në mbështetjen më të qëndrueshme të zhvillimit ekonomik.

Prej kohësh tashmë vërehet rritje e ndjeshme e vizitorëve, si vendas ashtu edhe të huaj që provon interesin në rritje për thesaret tona kulturore, krahas natyrës dhe ofertës akomoduese e shlodhëse.

Ndërkaq, janë rreth 500 objekte të restauruara e mirëmbajtura, nga të cilat 210 objekte restauruar me buxhet shteti dhe donatorë, 190 objekte mirëmbajtur me buxhet shteti, 99 objekte private trashëgimie kulturore përfitues nga buxheti i shtetit për Bonusin e Rijetëzimit, investime këto që kanë kontribuar në rritjen e turizmit kulturor.

(ATSH)