Ambasadori i Bashkimit Europian në Shqipëri, Silvio Gonzato, uroi sot shqiptarët për çeljen e negociatave për grupkapitullin “Themeloret”.

Në një postim në rrjetet sociale Gonzato tha se “e ardhmja e Shqipërisë është në BE”.

“Urime të përzemërta për të gjithë shqiptarët për këtë hap të madh përpara. Sot hapëm negociatat për grupin e parë të kapitujve, ata themelorë. I gatshëm me ekipin tim të Delegacionit të BE-së për të mbështetur Shqipërinë në hapat përfundimtarë të rrugëtimit të saj për anëtarësim në BE,” theksoi Gonzato.

Në Konferencën Ndërqeveritare BE-Shqipëri në Luksemburg u çelën sot negociatat për grupkapitullin “Themeloret”. Kapitujt për të cilët u hapën negociatat janë: funksionimi i institucioneve demokratike; reforma në administratën publike; Gjyqësori dhe të drejtat themelore; Drejtësia, liria dhe siguria; kriteret ekonomike; prokurimi publik; Statistikat dhe kontrolli financiar.