Shqipëria dhe Turqia nënshkruan marrëveshje e bashkëpunimit mes dy vendeve në fushën ushtarake.

Ministri i Mbrojtjes, Niko Peleshi pjesë e delegacionit shqiptar të kryesuar nga Kryeministri Edi Rama që po viziton Turqinë për takimin e Këshillit Strategjik të Nivelit të Lartë mes dy qeverive, shprehu falënderim për mbështetjen e vazhdueshme që ka dhënë qeveria turke për modernizimin e Forcave të Armatosura të Shqipërisë.

“Mirënjohje të përzemërt për mikpritjen vëllazërore dhe një falënderim për mbështetjen e vazhdueshme për modernizimin e Forcave të Armatosura të Shqipërisë, aleates sonë dhe partneres strategjike, Turqisë”, tha Peleshi.

Sipas tij, marrëveshja e bashkëpunimit ushtarak mes dy vende, është shprehje e raportit të ngushtë ndërmjet Shqipërisë dhe Turqisë.

“Nënshkrimi i Marrëveshjes së Bashkëpunimit Ushtarak, shprehje e raportit tonë të ngushtë që do të vijojë në interes të stabilitetit dhe sigurisë në Ballkanin Perëndimor, në rajonin e Mesdheut dhe më tej”, u shpreh Peleshi.