Shtetet e Bashkuara të Amerikës vlerësojnë rolin në rritje të Agjencisë së Mbikëqyrjes Policore në forcimin e zbatimit të ligjit dhe llogaridhënies, si rruga për ndërtimin e besimit tek Policia e Shtetit.

Përmes një njoftimi për mediat, Ambasada e SHBA në Tiranë ka dhënë detaje mbi një takim të zhvilluar të mërkurën mes të ngarkuarit me punë të diplomacisë amerikane në Tiranë, David Wisner dhe Kreun e ri të Agjencisë së Mbikëqyrjes Policore Florian Sulejmani.

“Gjatë takimit ekspertët e zbatimit të ligjit të Ambasadës së SHBA në Tiranë, vlerësuan rolin në rritje të agjencisë në forcimin e mekanizmave të mbikëqyrjes së zbatimit të ligjit dhe rritjen e transparencës, llogaridhënies dhe efikasitetit brenda organeve ligjzbatuese të vendit”, njofton ambasada e SHBA.

“Llogaridhënia e vërtetë është thelbësore për ndërtimin e besimit te forca policore shqiptare dhe ne do të vazhdojmë të punojmë me drejtuesit e organeve të zbatimit të ligjit në Shqipëri për të zgjeruar këtë kapacitet”, përfundon njoftimi i Ambasadës së SHBA në Tiranë.