Kryeministri Edi Rama deklaroi sot se gjatë vitit 2023 ka pasur rënie të mëtejshme të papunësisë reale.
Në konferencën e fundvitit me gazetarët, Rama tha se papunësia është më e ulëta e të gjitha viteve deri tani 10.5%.
‘Synimi është që vitin e ardhshëm të fillojmë të zbresim hap pas hapi nën 10%”, tha ai.
“Paga minimale këtë vit u rrit në vlerën e 40 mijë lekëve që praktikisht përkon falë forcimit të monedhës vendave si asnjëherë më parë me 400 euro. Po ashtu kanë filluar të gjitha programet e mbështetjes dhe kompensimeve qoftë për efektet e rritjes së kontributeve të sigurimeve shoqërore e shëndetësore për çdo të punësuar me pagë minimale, apo pensionet që falë indeksimeve të njëpasnjëshme të bëra kanë arritur në vlerën rreth 9 %”, tha Rama.
Kryeministri theksoi se paga në sektorin publik ka vazhduar të rritet ndjeshëm dhe vitin e ardhshëm në qershor ato do të kenë një tjetër rritje të konsiderueshme të parashikuar në buxhetin 2024, kur arsimtarët, ushtarakët, punonjësit e policisë, mjekët dhe të gjithë punonjësit e administratës do të kenë një rritje që do ta çojë faktikisht pagën mesatare në sektorin publik në 900 euro”, tha ai.
Po ashtu, Rama theksoi se filloi programi i mbështetjes me kreditë e garantuara nga qeveria për punonjësit e policisë, ushtarakët e mjekët, për çiftet e reja deri në moshën 40 vjeç.
“Ky program është i mbështetur financiarisht për të arritur fillimisht një shifër prej 1 mijë shtëpish për këto 3 kategori që janë edhe shërbëtorë 24 orë në 7 ditë të javës të shtetit dhe qytetarëve të Republikës së Shqipërisë”, tha ai.
