Kryetarja e Kuvendit, Lindita Nikolla, u takua sot me Ambasadorin e ri të Suedisë, Niklas Ström.

Gjatë takimit u diskutua mbi rritjen e bashkëpunimit politik, ekonomik e parlamentar midis të dy vendeve.

Kryetarja Nikolla falenderoi parlamentin, qeverinë dhe ambasadën e Suedisë në Tiranë për mbështetjen e vazhdueshme të zhvillimit dhe demokratizimit të Shqipërisë.

Ajo nënvizoi se, “janë të gjitha mundësitë që, përveçse një donatore, Suedia të bëhet edhe një partnere e fuqishme ekonomike dhe tregtare e Shqipërisë. Shqipëria do të vijojë të mbështesë anëtarësimin e shpejtë të Suedisë në NATO, si një rrugë për mbrojtjen e paqes dhe sigurisë në Europë e më gjerë. Ne jemi mirënjohës që Suedia vijon të mbështesë me vendosmëri anëtarësimin e Shqipërisë dhe BP në BE, si një vlerë e shtuar për Evropën.”

Ambasadori i Suedisë, Niklas Ström, u shpreh se, është një privilegj të shërbejë në Shqipëri dhe të bashkëpunojë me Kuvendin, qeverinë, institucionet dhe qytetarët e Shqipërisë për forcimin e marrëdhënieve dhe miqësisë mes dy vendeve tona, të cilat po rriten dita-ditës.

“Suedia do të mbështesë fuqimisht anëtarësimin e Shqipërisë në BE, si një vend gjithnjë e më i rëndësishëm për Suedinë, aleate e ngushtë në OKB, OSBE dhe organizata të tjera ndërkombëtare”, theksoi ai. /ATSH