Kryetarja e Kuvendit, Lindita Nikolla, priti sot ambasadorin e ri të Gjermanisë, Karl Bergner, me rastin e fillimit të misionit të tij në Shqipëri.

Kryetarja Nikolla i uroi ambasadorit Bergner suksese në detyrën e tij në Tiranë dhe vuri në dukje vullnetin e Kuvendit për vijimin e bashkëpunimit të shkëlqyer politik dhe të gjithanshëm mes Shqipërisë dhe Gjermanisë.

Nikolla shprehu vlerësimin për kontributin e Gjermanisë në mbështetjen e zhvillimit ekonomik, të mirëqenies dhe konsolidimin e institucioneve demokratike në Shqipëri, veçanërisht për mbështetjen e reformës në drejtësi, si edhe gadishmërinë e Kuvendit për të bashkëpunuar me ekspertë të Bundestagut edhe për përfundimin e reformës zgjedhore.

Ambasadori Bergner nënvizoi se, mbështetja e Gjermanisë për Shqipërinë do të vazhdojë dhe Ambasada e Gjermanisë në Tiranë do të nxisë bashkëpunimin mes dy vendeve si edhe bashkëpunimin parlamentar mes Kuvendit dhe Bundestagut dhe parlamenteve të landeve.

Kryetarja Nikolla dhe Ambasadori Bergner diskutuan edhe mbi prioritetet e sesionit të ri parlamentar dhe kryesimin nga Shqipëria të Procesit të Berlinit përgjatë vitit 2023, si rikonfirmim i kontributit të vendit tonë si faktor stabiliteti dhe evropianizimi në Ballkanin Perëndimor.