Kryeministri Edi Rama ndau sot pamje nga projekti fitues i Muzeut “Besa”, realizuar nga studio zvicerane “Oppenheim Architecture”.

Rama u shpreh se ky muze do të ruajë për brezat një pasqyrë të artë të shqiptarisë, atë të shpëtimit të hebrenjve gjatë Luftës së Dytë Botërore, si edhe do t’u ofrojë të gjithëve një hapësirë opinionesh, debatesh, shprehjesh artistike e kulturore mbi tolerancën, solidaritetin, humanizmin.

Studio arkitekturore nga Zvicra, “Oppenheim Architecture” është fituese e projektit për ndërtimin e Muzeut “Besa”, që i dedikohet historisë së lavdishme të shpëtimit të hebrenjve nga shqiptarët gjatë Luftës së Dytë Botërore, por jo vetëm.

Në garë ishin pesë studio arkitekturore ndërkombëtare të cilat shpalosën projektet e tyre, por në fund juria përzgjodhi studion nga Zvicra “Oppeheim Architecture” për t’i besuar projektin i cili në qendër të tij do të ketë historinë e pandashme të Shqipërisë me virtytin më të njohur të shqiptarëve “Besën”.

Këtë të hënë në Teatrin Kombëtar të Operas dhe Baletit u prezantuan projektet finaliste të cilat garuan në konkursin ndërkombëtar për Muzeun “Besa”. Konkursi Ndërkombëtar u shpall në 13 shkurt 2023. Rrugëtimi për realizimin e tij, nisi me 17 projektues që ju përgjigjën fillimisht thirrjes së Ministrisë së Kulturës, duke kaluar më pas në faza të tjera të konkursit, për të arritur tek 5 finalistët.

Studiot prestigjioze prej të cilave u përzgjodh kompania fituese ishin: MVRDV nga Holanda, EAA “Emre Arolat Architecture” nga Turqia, “Schneider & Schumacher” nga Gjermania, “Cook Haffner Architecture Platform” nga Anglia dhe po ashtu kompania fituese “Oppenheim Architecture” nga Zvicra.

Prej datës 12 prill, kur u bë shpallja e finalistëve, nisi edhe faza e dytë, gjatë së cilës finalistët u ftuan për t’u njohur nga afër me godinën ekzistuese të banesës së Libohovitëve, Monument Kulture, Kategoria I, e cila gjendet në qendrën historike të Tiranës.

Muzeu i “Besës” është i lidhur shpirtërisht me Muzeun Hebraik në Vlorë. Ndërtimi i tij përbën një sfidë pasi nga njëra anë bëhet fjalë për restaurimin e muzealizimin e një godine historike në zemër të Tiranës, por njëkohësisht duhet të flasë me zërin e kohës.