Zëvendësministrja e Turizmit dhe Mjedisit, Vilma Bello dhe drejtoresha e përgjithshme e Agjencisë Kombëtare të Turizmit, Zana Çela mikpritën një grup operatorësh të medieve turistike gjermane, të kryesuar nga Oliver Graue, shefi i redaksisë së FVW-së, media më e madhe e Turizmit dhe Mikpritjes në tregun gjermanishtfolës, me mbi 130 000 lexues ditorë, profesionistë në industrinë e turizmit.

Zëvendësministrja Bello dhe drejtoresha Çela theksuan vizionin e qeverisë shqiptare në zhvillimin e turizmit të qëndrueshëm përgjatë gjithë vitit.

Sipas njoftimit të Ministrisë së Turizmit, operatorët turistikë gjermanë shprehën dëshirën e tyre për të zhvilluar një tur në Rivierën e bukur Shqiptare me premtimin se do të përcjellin tek qytetarët gjermanë imazhin e Shqipërisë si një destinacion shumë i veçantë dhe mikpritës.

Këtë vit numri i turistëve gjermanë që kanë vizituar Shqipërinë është afërsisht 40 % më shumë se në të njëjtën periudhë të vitit të shkuar, dhe kjo, edhe falë promovimit të Shqipërisë në shumë media prestigjoze ndërkombëtare.