Kandidati i PD-së, për Tiranën Roland Bejko takoi sot banorë të njësisë bashkiake nr. 8 nga, ku kërkoi votën në zgjedhjet e 14 majit.

“Shumë njerëz pyesin që edhe ju keni 32 vite që merreni me politikë, ku është ndryshimi mes Saliut, Edit, Ilirit, Erionit, Belindit dhe ty. Ndryshimi qëndron këtu, në 32 vite unë nuk jam korruptuar, kam ruajtur dinjtetin tim, jam përpjekur ta rris veten time duke u edukuar dhe u shkolluar brenda dhe jashtë vendit. Në 32 vite unë kam investuar nga jeta ime për të qenë një profesionist i mirë i menaxhimit dhe pushtetit vendor. Në 32 vite aty ku më ka emëruar qoftë Berisha apo kushdo tjetër e kam nderuar me punën time, duke realizuar rekorde pozitive në atë punë gjë që për shtat nuk i ka shkuar Berishës t’i përmendë këto arritje”, tha ai.

Bejko u shpreh se klasa politike në 32 vite kishte qëllim të pasuronin klanin e familjen e tyre, në mënyrë që të mbanin pushtetin e përjetshëm si brenda partisë edhe në qeverisjen e vendit.

“Arritjet s’kanë qenë vetëm të miat, arritjet kanë qenë të demokratëve, arritjet kanë qenë të atij që ka qenë kryeministër por që nuk zgjodhi modelin tim në krah, por zgjodhi modelin e atyre që kishte ndarë para, pushtet, servilizëm, korrupsion. Kjo na ndan ne, mua dhe Berishën dhe juve që jeni këtu. Na ndan fakti që s’jemi berishist, e kemi mbështetur për t’u bërë kryeministër, kemi investuar ne për ju të rinjtë, familjet tuaja në 32 vite që PD të lartësohej, të bëhej një PD demokratike dhe europiane që ta integronte Shqipërinë në BE. Asgjë nuk u bë e plotë, gjithçka ngeli në mes sepse kjo klasë politike nuk e kishte mendjen me qëllim që të pasuronin klanin e familjen e tyre, në mënyrë që të mbanin pushtetin e përjetshëm si brenda partisë edhe në qeverisjen e vendit”, tha Bejko. /ATSH