Komisioni i Rithemelimit të Partisë Demokratike ngriti akuza ndaj Kolegjit Zgjedhor se po vendos në emër të qeverisë se kush do të jetë drejtuesi i koalicionit opozitar “Bashkë fitojmë“.

Sekretari për Çështjet ligjore në Komisionin e Rithemelimit të Partisë Demokratike, Ivi Kaso deklaroi sot se, “Kolegji Zgjedhor ka zgjedhur të veprojë si togë pushkatimi, jo trupë gjyqtarësh të Republikës, duke i hequr të drejtën opozitës që të caktojë drejtuesin e koalicionit në vendoret e 14 majit”.

“Ankimimi që opozita i bëri vendimit të KAS u rrëzua, duke i kthyer institucionet e drejtësisë nga rojtarë të balancave, në roje të tekave të pushtetit. Ndërhyrja flagrante në të drejtën e një koalicioni zgjedhor dhe politik për të caktuar vetë, me vullnet të lirë, vendim të pjesëmarrësve dhe simbolikë politike, drejtuesin e fushatës, është vendim që jehon nga katakombet e viteve 45-48, kur gjykatat e Enver Hoxhës vranë me dekrete gjakatare çdo grimë të pluralizmit në vendin tone”, tha ai në një deklaratë për mediet.

Sipas tij, “kjo ndërhyrje në simbolikën politike, që është e drejtë ekskluzive e organizatave politike dhe nuk caktohet me gjykatë, dhe për më shumë nuk u përket gdhënjve të drejtësisë tonë, që gdhihen me urdhra të qeverisë e ngrysen me torba të ryshfetit poliitk, fyen edhe studentët e dobët të Jurisprudencës”.

“Edhe për drejtësinë tonë, që nuk ka turp kur bëhet vegël dhe vetëm si vegël e ngre çekanin për të marrë vendime, ky ishte një rekdord i zi. Me këtë vendim, togat e Kolegjit u thanë shqiptarëve se, edhe të zotin e shtëpisë ta caktojnë ata, sipas dëshirës që shpreh qeveria. Ky vendim është politik dhe jo juridik, dhe si i tillë do të trajtohet. Është kundër pluralizmit dhe vetëm si i tillë do të kujtohet. Është vërtetim se ndarja e pushteve nuk ekziston dhe vetëm si i tillë do të regjistrohet”, deklaroi Kaso.

Ai theksoi se, “ky vendim, sa ç’tregon dorën e hakmarrjes së drejtësisë të varur nga qeveria, dëshmon edhe frikën që e ka kapur këtë të fundit”.

“Ditën, Rama-Balla e Gjiknuri-Balluku dalin e thonë në media se fitojmë kaq e aq, dhe natën paguajnë vendime për të eleminuar kundërshtarin. Nëse janë kaq të fortë, pse investohen kaq fort, duke turpëruar pengjet e tyre në drejtësi, të cilët mund t’i përdornin për halle të tjera. Por, halli i tyre dihet: të mësuar duke fituar afrofe apo duke vjedhur vota me banda dhe resurse shtetërore, Edi Rama kërkon të mbajë në dorë çdo siguresë të 14 majit”, deklaroi Kaso. /ATSH