Drejtoresha e përgjithshme ekzekutive e Autoritetit të Mbikëqyrjes Financiare (AMF), Adela Xhemali zhvilloi një takim me përfaqësues të Shoqatës së Shoqërive të Sigurimit të Jetës, Pensioneve dhe Fondeve të Investimit, në kuadër të përpjekjeve për harmonizimin e sektorit financiar jobankar me standardet e Bashkimit Evropian.

Gjatë takimit, Xhemali theksoi se transpozimi dhe implementimi i Acquis Communautaire për Kapitullin 9 “Shërbimet Financiare” synon rritjen e besimit në treg, përmirësimin e cilësisë së produkteve dhe shërbimeve, si dhe forcimin e mbrojtjes së konsumatorit, veçanërisht në sektorin e sigurimit të jetës, pensioneve private dhe fondeve të investimit.

Diskutimi u përqendrua në përafrimin ligjor dhe rregullator me acquis-in e BE-së, duke nënvizuar rëndësinë e forcimit të mbikëqyrjes dhe stabilitetit financiar.

Përfaqësuesit e Shoqatës vlerësuan dialogun me AMF dhe konfirmuan angazhimin për të kontribuar në reformimin e kuadrit ligjor, duke synuar zhvillimin e qëndrueshëm të tregut sipas praktikave më të mira evropiane.

Palët dakordësuan vijimin e konsultimeve teknike mbi prioritetet e përafrimit dhe forcimin e bashkëpunimit, me qëllim garantimin e një kuadri të qartë rregullator, mbikëqyrje efektive dhe zhvillim të qëndrueshëm të tregjeve të sigurimit të jetës, pensioneve private dhe fondeve të investimit.

Burimi ATSH