Mbrojtja e gjuhëve në botë, lufta kundër zhdukjes së tyre dhe ruajtja e identitetit të kombeve nëpërmjet gjuhës, janë qëllimet kyçe të manifestimeve që sot organizohen në shkallë botërore, në Ditën Ndërkombëtare të Gjuhës Amtare.

Në kuadër të kësaj dite, Qendra për Hapje dhe Dialog (COD) organizoi aktivitetin “Dialektet e Gjuhës Shqipe dhe Arbërishtja”.

Takimi solli në qendër pasurinë e dialekteve dhe të folurave krahinore si pjesë e identitetit tonë kombëtar, duke u ndalur te evoluimi i shqipes së folur ndër shekuj dhe raporti i saj me gjuhën standarde. Arbërishtja u trajtua si një dëshmi e gjallë e vazhdimësisë historike të shqipes dhe si një urë lidhëse me diasporën arbëreshe në Itali, ku u ndanë edhe përvoja konkrete mbi ruajtjen, kultivimin dhe mbështetjen institucionale të saj në këto komunitete.

Në bashkëpunim me gjuhëtarët dhe akademikët e mirënjohur: prof: Rami Memushaj, Ledi Shamku, Ardian Doka, Anila Omari, Pëllumb Xhufi dhe nën interpretimin e Ansamblit të Këngëve dhe Valleve Popullore të Teatrit të Operas dhe Baletit, në COD u krijua një atmosferë të veçantë ku fjala, historia dhe tradita u ndërthurën në një përvojë të plotë kulturore.

Dita Ndërkombëtare e Gjuhës Amtare është shpallur nga UNESCO në vitin 1999, me synimin për të mbrojtur diversitetin gjuhësor në botë.

Burimi ATSH