Kryeministri Edi Rama ndau sot pamje nga Ministeriali i Korridorit VIII, i zhvilluar në Tiranë nën kujdesin e Ministrisë për Evropën dhe Punët e Jashtme.

Kryeministri Rama e cilësoi takimin si një moment të ri për avancimin e sinkronizuar të kësaj arterieje strategjike, duke theksuar rëndësinë e saj për ndërlidhjen, zhvillimin ekonomik dhe ndërveprueshmërinë mes vendeve aleate.

Sipas Kryeministrit, Korridori VIII përfaqëson një projekt që kontribuon në forcimin e arkitekturës së sigurisë europiane, duke rritur bashkëpunimin rajonal dhe integrimin në rrjetet strategjike të transportit dhe infrastrukturës.

Ministria për Evropën dhe Punët e Jashtme mirëpriti sot Ministerialin e Korridorit VIII, me fokus avancimin e bashkëpunimit strategjik në fushën e ndërlidhjes, qëndrueshmërisë dhe integrimit rajonal.

Ministrja për Evropën dhe Punët e Jashtme, Elisa Spiropali, mikpriti krerët e delegacioneve pjesëmarrëse në këtë ministerial, kushtuar projektit strategjik për ndërlidhjen, sigurinë dhe zhvillimin ekonomik, i cili synon të shndërrojë gjeografinë e rajonit në mundësi konkrete bashkëpunimi dhe rritjeje.

Në ministerial morën pjesë delegacionet e kryesuara nga Antonio Tajani, zëvendëskryeministër dhe ministër i Punëve të Jashtme i Italisë; Timčo Mucunski, ministër i Punëve të Jashtme dhe Tregtisë së Jashtme i Maqedonisë së Veriut; Nikolay Pavlov, zëvendësministër i Punëve të Jashtme i Bullgarisë; si dhe ambasadori i Rumanisë në Shqipëri, Octavian Şerban.

Sesioni ministror në Pallatin e Brigadave u drejtua nga ministrja Spiropali. Diskutimet u fokusuan në avancimin e Korridorit VIII si bosht strategjik për ndërlidhjen europiane, zhvillimin ekonomik dhe bashkëpunimin rajonal, duke forcuar njëkohësisht rolin e tij në qëndrueshmëri, mobilitet ushtarak dhe ndërveprueshmëri midis Bashkimi Europian dhe NATO-s.

Ministeriali u organizua në katër panele. Dy panelet e para trajtuan vizionin politik mbi prioritetin europian për zhvillimin ekonomik dhe rolin e Korridorit VIII si katalizator i ndërlidhjes së qëndrueshme dhe rritjes së gjelbër.

Paneli i tretë u fokusua në dimensionin gjeopolitik të projektit, ndërsa paneli i katërt trajton çështjet e financimit.

Aktiviteti përfshiu fjalët e hapjes nga ministrja Spiropali, të pasuara nga fjalimet e përfaqësuesve të vendeve pjesëmarrëse.

Më pas u realizua fotoja familjare, e ndjekur nga konferenca e përbashkët për shtyp.

Korridori VIII konsiderohet një projekt strategjik për ndërlidhjen, sigurinë dhe zhvillimin ekonomik, që synon të forcojë integrimin rajonal dhe të rrisë qëndrueshmërinë përmes bashkëpunimit të koordinuar mes vendeve pjesëmarrëse.

Marrë nga ATSH