Zëvendëskryeministri dhe ministri i Punëve të Jashtme i Italisë, Antonio Tajani, deklaroi sot se, Shqipëria është një partner kyç për Italinë dhe theksoi rëndësinë strategjike të Ballkanit Perëndimor dhe Korridorit VIII.

Në konferencën për shtyp në përfundim të Ministerialit të Korridorit VIII, që u zhvillua në Tiranë, Tajani nënvizoi se ky rajon është një prioritet strategjik për zhvillimin ekonomik dhe begatinë e qytetarëve të vendeve pjesëmarrëse.

“Korridori VIII ka një rëndësi thelbësore për Italinë. Është një përparësi e qartë, që synon hapjen e rrugës për bashkëpunimin ndërmjet vendeve tona në zbatimin e këtij projekti, i cili është një nga aspektet më të rëndësishme europiane. Ai përforcon lidhjen ndërmjet detit Adriatik dhe detit të Zi dhe mbështet infrastrukturën rrugore, hekurudhore, por edhe mbrojtjen europiane dhe atë të NATO-s”, theksoi Tajani.

Ai shtoi se, Korridori VIII ka një rol të veçantë edhe në procesin e zgjerimit të Bashkimit Europian dhe integrimin e vendeve të Ballkanit Perëndimor që janë shtete kandidate.

“Po punojmë fort për anëtarësimin e plotë në BE të këtyre vendeve. Korridori VIII është pjesë e rëndësishme dhe strategjike për Italinë dhe për Ballkanin Perëndimor, për stabilitetin, paqen, rritjen ekonomike dhe për një Europë sa më të fortë”, deklaroi Tajani, duke theksuar angazhimin e Italisë për thellimin e bashkëpunimit rajonal dhe zhvillimin e infrastrukturës strategjike.

/Marrë nga ATSH