Zëvendëskryeministri dhe ministri i Punëve të Jashtme i Italisë, Antonio Tajani, mori pjesë sot në Ministerialin e Korridorit VIII që po zhvillohet në Tiranë, me fokus avancimin e bashkëpunimit strategjik në fushën e ndërlidhjes, qëndrueshmërisë dhe integrimit rajonal.

Në fjalën e tij, Tajani theksoi se për Italinë, Korridori VIII nuk është vetëm një zgjedhje teknike apo infrastrukturore, por një zgjedhje politike me rëndësi strategjike.

“Edhe për Italinë, Korridori VIII nuk është vetëm një zgjedhje teknike dhe infrastrukturore, është një zgjedhje politike. Kjo është pjesë e strategjisë sonë për ribashkimin e Ballkanit me historinë europiane. Është një përparësi strategjike për qeverinë italiane dhe për mua personalisht”, u shpreh ai.

Tajani nënvizoi angazhimin e Italisë për të mbështetur integrimin europian të rajonit, duke theksuar se procesi duhet parë si ribashkim dhe jo si zgjerim.

“Ne do të bëjmë maksimumin për t’ju ndihmuar që të jeni pjesë e Bashkimit Europian. Jam shumë i qartë për Ballkanin Perëndimor dhe gjithashtu për Ukrainën. Jemi në favor që Ukraina të jetë pjesë e BE-së, por përpara duhet të plotësojmë ribashkimin. Them ribashkim, nuk është zgjerim – ju jeni europianë”, deklaroi ai, duke kujtuar se një proces i tillë ka ndodhur më parë me Bullgarinë dhe Rumaninë.

Sipas Tajanit, Korridori VIII përfaqëson një nismë politike të rëndësishme për të mbështetur integrimin e rajonit në BE dhe për të forcuar ndërlidhjen dhe bashkëpunimin rajonal.

“Deklarata e Përbashkët që do të miratojmë sot do të përcjellë një mesazh të fuqishëm politik. Korridori VIII është një përparësi e përbashkët strategjike për ekonomitë tona dhe për sigurinë tonë. Jemi tërësisht të angazhuar për të hedhur hapa konkrete për realizimin e tij”, theksoi ai.

Duke u ndalur te dimensioni ekonomik, Tajani vuri në dukje se Korridori VIII është thelbësor për Italinë, veçanërisht për tregtinë.

Gjithashtu ai nënvizoi se, për lëvizshmërinë e NATO-s ky Korridor do të jetë shumë i rëndësishëm.

Marrë nga ATSH